“अरे, उगाच कोणाच्या तरी वंशाचं झाड,
नायतर वेल काढत,
वंशावळी कोरत,
सजवत
कशाला बसतोस?
जवाहरलाल नेहरू, इंदिरा गांधी,
फिरोज गांधी,
राजीव गांधी, राहुल गांधी
यांची जातपात, धर्म, कुंडली,
पत्रिका, गोत्र, हस्तरेषा
हे सारं विषयांतर झालं रे !
आता फैज, जहीर
आणि कोण कोण तरक्कीपसंद, फेक्युलर कवी…
त्यांच्या वंशावळी घेतल्या करायला?
असलं काही लिहिताना
आपण स्त्रियांच्या विषयी
हीन दृष्टीने लिहितो आहोत,
फॉरवरडतो आहोत
याचं भान स्त्रीने तरी ठेवावं..
द्वेषप्रेमामुळे भान
आणि तारतम्य विसरतं
ते असं
ते सोड
मुद्दा बोल की
एक तरी
तू खूप श्रम करून, पुस्तके , इंटरनेट
आणि
तुझ्या आवडीच्या “नासा”चं डिजिटल ग्रंथालय धुंडाळून
काढलेली ही सारी वंशावळीची माहिती
वाचून वाचून
तुझा व्यासंग जब्बरदस्त आहे
हे कळलं
पण कंटाळा आला
अलीकडे
असल्या वंशावळ्या लिहिण्यात तुला काय इंटरेस्ट असतो
हे कळत नाही, गड्या
भाऊ, कोणी दिलं हे रिकामटेकडं काम तुला?
कोणाचा काका हिंदू
तर कुणाचा पुतण्या कन्व्हरटेड मुस्लिम, हिंदू ब्राह्मण आजोबांची
मावस सुनेची चुलत मामीदेखील
हिंदू ब्राह्मण (किती छान वाटलं न? ),
तिची चुलत मावशी ख्रिश्चन
नायतर शीख,
ख्रिश्चन नणंदेची
मावससासू हिंदू..
तिच्या सुनेचा
अनौरस मुलगा ज्यू…
असेल
असू दे नं
जाऊ दे न यार..
कोण कोणाबरोबर झोपलं?
तुझं त्यात काय बिघडलं ?
त्यांच्या बेडरूममध्ये
डोकावण्याला
“वायुरिझम” म्हणतात
तो एक रोग आहे
त्याने तुला
आणखी एक व्यसन लागणार आहे
त्याला हर्षवायूरिझम म्हणतात
ते तुझ्या तब्येतीलाही चांगलं नाही
तू राहा नं
अतिशुद्ध वंशाचा
आर्य,
वैदिक,
ब्राह्मण..
हिंदू प्युअर!
हवंतर
स्वतःचा डी एन ए तपासून घे,
हवंतर
दर वर्षी तपासून घे
वाढदिवसाला
वेगळा दिसला तं
बदलून घे
हवा तसा
देतात ते.”
-मोहन देस
