आंतरिक भावना आणि विचारांबाबत अधिक सजग राहा!

क्वांटम फिजिक्स सांगतं की आपले विचार आणि एनर्जी (ऊर्जा) आपल्या वास्तवावर प्रभाव टाकतात. आपल्या भोवतालचे जग हे अनंत शक्यतांचे जग (Multiverse) आहे आणि आपण ज्या शक्यतेवर लक्ष केंद्रित करतो, तीच आपली प्रत्यक्षात येणारी गोष्ट ठरते.अल्बर्ट आईनस्टाईनच्या E=mc² या संकल्पनेनुसार, ऊर्जा आणि वस्तुमान (Energy & Mass) परस्परांत रूपांतरित होऊ शकतात. म्हणजेच, आपल्या सर्व विचारांमध्ये आणि भावनांमध्ये देखील ऊर्जा असते. क्वांटम सिद्धांतानुसार, आपली वस्तुस्थिती ही नुसत्या निरीक्षणामुळे निश्चित होते. जर आपण विशिष्ट परिस्थितीवर लक्ष केंद्रित केले, तर तीच परिस्थिती आपल्या आयुष्यात आकार घेते. आता हे एक विधान आहे.यावर असं वाटू शकतं की हि काय वेडगळ बडबड आहे. म्हणजे तुला असं म्हणायचं आहे का सानिया, की एखादी गोष्ट जर वाईट घडली तर मग पुढे ज्या एकामागून एक वाईट गोष्टी घडत जातात, ते मी स्वतः तसा विचार केल्यामुळे?? व्हॉट नॉन्सेन्स? यात काय डोंबलं विज्ञान आलं? हा मूर्खपणा आहे आणि अशा दोनशे पासष्ठ गोष्टी तुम्ही मला ऐकवाल.

तर यावर माझं उत्तर हे असेल, कि पहिली जी वाईट घटना घडली त्यानंतर तुम्ही जर निगेटिव्ह थॉट पॅटर्न्स बाबत अवेअर झाला आणि मग प्रयत्न करून पॉझिटिव्ह थॉट पॅटर्न्सकडे लक्ष दिलं आणि व्हायब्रेशनल शिफ्ट दिलीत तर कदाचित पुढे घडणाऱ्या वाईट घटना थांबतील. थोडक्यात वाईट घटनाचक्राला स्थगिती मिळेल. असं होत खूपदा की आपली घरी चिडचिड झाली की कामाच्या ठिकाणी सुद्धा अगदी सध्या गोष्टीत आपण चिडतो किंवा व्हाईस व्हर्सा… हे अत्यंत स्वाभाविक आहे. आपण जेव्हा स्वतःला शांत करतो तेव्हा तीच गोष्ट आपल्याला छोटी वाटते आणि आपण बेटर पद्धतीने सिच्युएशन हॅन्डल करतो. पटतंय का?

हेच कारण आहे की काही लोक सतत अडचणींचा सामना करतात, तर काही जण सकारात्मकतेने भरलेले आयुष्य जगतात. जर आपण नेहमी समस्यांबद्दलच विचार करत राहिलो, तर त्याच समस्या पुन्हा-पुन्हा आपल्या वाट्याला येतात. उलट, जर आपण आपल्या ध्येयावर लक्ष केंद्रित केले, तर त्यादृष्टीने आपल्या आयुष्याची घडण सुरू होते. लक्ष केंद्रित करण्याच्या प्रक्रियेमुळेच विशिष्ट शक्यता वास्तवात बदलते.

जर आपण नकारात्मकतेवर भर दिला, तर ती आणखी वाढते. त्यामुळे ज्या गोष्टींना आपण महत्त्व देत नाही, त्या आपल्याला फारसा त्रास देत नाहीत. हे वाक्य पुन्हा वाचा. आपल्याला कोणी त्रास द्यायचा हे आपण ठरवू शकतो. आपल्या एखाद्या पोस्टवर लोक तुटून पडतात. त्यातलं एखादं वाक्य धरून चावत बसतात. उत्तर द्यायला गेलं तर अजून चिघळतं.  ९९ टक्के वेळी आपण काहीही उत्तर दिलं तरी कमेंट करणारा त्यातही लूपहोल काढून पुन्हा अजून कमेंट करत बसतो. काहीवेळा होतो त्रास आपल्याला. त्यापेक्षा काढून घेतलं, मामला सॉल्व्ह. नो एक्सप्लेनेशन.. वाटलं तर घ्या नाहीतर जाऊ द्या.

आता ही संकल्पना आधुनिक वैज्ञानिकांपुरती मर्यादित नाही. नेविल गॉडर्ड या प्रसिद्ध तत्त्वज्ञाने देखील हेच सांगितले आहे की “तुमच्या कल्पनेत निर्माण झालेले चित्रच तुमच्या वास्तवात प्रकट होते.” ते म्हणतात की “फक्त विचार बदलून काही होत नाही, तर त्यासोबत भावनात्मक विश्वास असणे महत्त्वाचे आहे.” आपण ज्या गोष्टीवर विश्वास ठेवतो आणि कल्पनाशक्तीने जणू त्या आधीच घडल्या आहेत असे समजतो, त्या अधिक वेगाने साकार होतात. त्यामुळे, जर तुम्हाला तुमचे जीवन बदलायचे असेल, तर तुमच्या अंतरिक भावनांवर आणि विचारांवर अधिक सजग राहा.